«Астон Вилла»нинг испаниялик бош мураббийи Унаи Эмери Ла Лигада «Реал» ва «Барселона» билан қолган клублар ўртасидаги фарқ тобора ортиб бораётгани ҳақида фикр билдирди.
«Фарқ ошиб бормоқда, чунки молиявий фэйр-плей тизимининг ўзи бунга имкон беради. «Реал» ва «Барселона» миллиардлаб даромад олишга қодир. Аммо «Атлетико»да 500–600 миллион, қолган клубларда эса 150, 100 миллион ёки ундан ҳам кам бўлса... Фарқ жуда катта», — дея Эмерининг сўзларини Diario de Sevilla нашри келтирди.
Етти турдан сўнг «Барселона» 21 очко билан Испания Ла Лигаси турнир жадвалида пешқадамлик қилмоқда. «Реал» эса 15 очко билан тўртинчи ўринда бормоқда.
Қайд этиш жоиз, сўнгги 20 йил ичида Испания чемпионлиги фақат икки марта «Реал» ёки «Барселона»га насиб этмаган. Ҳар икки ҳолатда ҳам чемпионликни «Атлетико» қўлга киритган.
