Мадриднинг «Реал» клуби ҳимоячиси Ферлан Менди узоқ давом этган жароҳатидан сўнг майдонга қайтишга яқинлашмоқда.

AS нашри маълумотига кўра, 31 ёшли француз тикланиш жараёнининг якуний босқичида бўлиб, яқин вақт ичида клуб тиббий штаби томонидан умумий гуруҳ машғулотларида иштирок этиш учун рухсат олиши кутилмоқда. Менди ҳозирда «Реал»нинг машғулот базасида югуриш ва тўп билан индивидуал машқларни бажармоқда.

Ҳимоячи ўтган мавсум якунида «Эспаньол»га қарши учрашувда ўнг оёғининг тўғри сон мушаги пайидан жароҳат олган эди. Кейинчалик футболчи жарроҳлик амалиётини ўтказди ва шу вақтдан буён тикланиш билан банд. «Реал» 11 май куни операция муваффақиятли ўтганини расман маълум қилган.

Менди учун асосий муаммолардан бири жамоа таркибидаги кучли рақобат бўлиши мумкин. AS маълумотига кўра, «Реал» чап қанот ҳимояси учун Марк Кукурелья ва Альваро Каррерасни таркибга қўшган. Шу сабаб француз футболчисининг асосий таркибдан жой олиши осон бўлмайди.

Менди ўтган мавсум барча мусобақаларда атиги 9 та ўйинда қатнашиб, майдонда 452 дақиқа ҳаракат қилди. У 2019 йилда «Реал» сафига қўшилганидан буён мадридликлар либосида 210 та учрашув ўтказган.

Француз ҳимоячисининг «Реал» билан амалдаги шартномаси 2028 йилга қадар мўлжалланган. Бироқ унинг Мадриддаги келажаги клуб ва футболчининг ҳамкорликни давом эттириш истагига боғлиқ бўлиб қолмоқда. Аввалроқ AS Менди шартномасини муддатидан олдин бекор қилишни режалаштирмаётгани ҳақида ҳам хабар берган эди.