Дания терма жамоаси ҳужумчиси Расмус Хойлунд Миллатлар лигаси 3-турида Португалияга қарши ўйиндан (2:4) кейин Португалия терма жамоаси бош мураббийи Жорже Жезушни нега туртганини тушунтирди. Учрашув Копенгагендаги «Паркен» стадионида бўлиб ўтди. Шунингдек, футболчи миллий жамоадаги ҳужумчи Криштиану Роналду билан боғлиқ вазият ҳақида ҳам фикр билдирди.
«Буларнинг барчасига сабаб — у ҳатто кўзларимга қарашга ҳам ҳаракат қилмагани. Менимча, бу спортга хос бўлмаган хулқ-атвор. Ўйин охирида қўлларни яхшилаб сиқиб кўриш керак. У менга совуққонлик билан қўл теккизди-да, кейин эътиборсиз қолдирди. Шунинг учун мен унга: “Сен жиддий гапиряпсанми?” дедим. Бор-йўғи шу.
Биламан, сизлар сарлавҳа учун материал излаяпсизлар ва уни оляпсизлар. Криштиану — менинг буюк қаҳрамоним эканини айтишдан қўрқмайман. У ҳар доим мен учун жуда муҳим бўлган. Менимча, унинг менталитети ажойиб. Умид қиламанки, Португалия ва Криштиану келишмовчиликларни ҳал қила олади. Чунки, менинг фикримча, барча даврларнинг энг яхши футболчиси учун ҳаммаси шу тарзда якунланиши ачинарли бўлар эди», — дея Хойлунднинг сўзларини A Bola нашри келтирди.
