Испания терма жамоаси бош мураббийи Луис де ла Фуэнте Миллатлар лигасида футболчиларнинг ўйин вақтини чеклашини маълум қилди. Мутахассиснинг айтишича, ҳеч бир ўйинчи тўртта учрашувнинг учтасини ҳам тўлиқ ўтказмайди.
«Қизил фурия» устози ҳатто Ламин Ямал учта баҳсни асосий таркибда бошлаганига қарамай, умумий ҳисобда атиги икки тўлиқ ўйинга тенг вақт майдонда ҳаракат қилганини таъкидлади.
«Муҳим бир жиҳатни алоҳида таъкидламоқчиман: ҳеч бир футболчи 270 дақиқадан, яъни тўртта ўйиндан учтасини тўлиқ ўтказишга тенг вақтдан ортиқ майдонда бўлмайди», — деди де ла Фуэнте.
6 октябрь куни Испания терма жамоаси сафарда Хорватияга қарши майдонга тушади. Жамоалар ўртасидаги биринчи учрашувда де ла Фуэнте шогирдлари 4:1 ҳисобида ғалаба қозонган эди.
