Ҳиндистон ва Уругвай миллий терма жамоалари ўртасидаги ўртоқлик учрашуви якунланди. Баҳс Ҳиндистоннинг Калькутта шаҳридаги "Вивекананда Юба Бхарати Криранган" стадионида бўлиб ўтди. Учрашувни ҳамюртимиз Рустам Лутфуллин бошқарди. Ўйин Уругвай терма жамоасининг 6:1 ҳисобидаги йирик ғалабаси билан якунланди.

Ҳисоб 11-дақиқада очилди. Уругвай терма жамоаси ҳужумчиси Дарвин Нуньес пенальтини аниқ амалга оширди. 22-дақиқада Ҳиндистон ярим ҳимоячиси Анирудх Тхапа жавоб голини урди.

Орадан олти дақиқа ўтиб, Максимилиано Хавьер Араухо Вильчес Уругвайни яна ҳисобда олдинга олиб чиқди. 53-дақиқада Родриго Саласар Ҳиндистон дарвозасига учинчи голни йўллади.

59-дақиқада Араухо Вильчес дубль қайд этди. 71-дақиқада Уругвай ярим ҳимоячиси Хуан Санабрия ҳисобни 5:1 кўринишига келтирди.

Учрашувдаги сўнгги гол 86-дақиқада урилди. Ҳужумчи Родриго Агирре рақиб дарвозасини ишғол қилиб, якуний ҳисобни белгилади — 6:1.

Ҳиндистон терма жамоаси ФИФА рейтингида 138-ўринни, Уругвай эса 20-ўринни эгаллаб турибди.