Англия терма жамоасининг собиқ сардори Гари Линекер «Манчестер Сити» Англия Премьер-лигасининг молиявий қоидаларини бузганини тан олиши ва жазони қабул қилиши керак, деб ҳисоблайди. У, шунингдек, якунда клуб аввал қўлга киритган чемпионлик унвонларидан маҳрум қилиниши мумкинлигини ҳам истисно этмади.

«Манчестер Сити» 2009/10 мавсумидан 2017/18 мавсумигача бўлган тўққиз мавсум давомида лиганинг молиявий қоидаларини бузиш бўйича қўйилган барча айбловлар юзасидан айбдор деб топилган. Бундан ташқари, клуб тергов билан ҳамкорлик қилишдан бош тортгани билан боғлиқ тўрт банднинг учтаси бўйича ҳам айбдор деб топилган.

Лига маълумотларига кўра, «Манчестер Сити» қарийб 10 йил давомида даромадларини сунъий равишда ошириш ва харажатларини камайтириш мақсадида «сохта» тижорат шартномаларидан фойдаланган. Бу маблағнинг умумий қиймати 900 миллион фунтдан ($1,19 млрд) ошган. Мазкур даврда клуб кўплаб совринларни қўлга киритган. «Сити» қарор устидан шикоят қилган ва ҳанузгача ўзининг айбсиз эканини таъкидлаб келмоқда.

«Эвертон», «Тоттенхэм» ва «Барселона»нинг собиқ ҳужумчиси Линекер ушбу можаро клубнинг ўзига ҳам, умуман Англия футболига ҳам зарар етказаётганига ишонч билдирди. Унинг фикрича, «Сити»нинг айбини тан олиши ушбу можарога нуқта қўйиши мумкин.

«Шубҳасиз, «Манчестер Сити» учун бу жуда ёмон кўринади, бу ҳақиқат. Бу футбол учун ҳам ёмон. Мен «Сити» ҳозир шунчаки айбини тан олиб: “Хўп, биз хато қилдик. Футбол манфаати йўлида буни қабул қиламиз, ҳар қандай жазони қабул қилиб, олдинга ҳаракат қиламиз”, деганини истардим.

Ўйлайманки, бу футбол учун фойдали бўларди ва ҳозир уларнинг обрўсини бироз сақлаб қолишга ёрдам берган бўларди. Гарчи бу содир бўлишига ишонишим қийин. Аммо бу зарар етказмоқда. Мен уларнинг мухлисларига ҳам, футболчиларига ҳам ҳамдардман», — дея Линекернинг сўзларини Tribal Football келтиради.

Линекердан «Сити» баҳсли даврда қўлга киритган АПЛдаги учта чемпионлик унвонидан маҳрум қилиниши керакми, деб сўралганда, у шундай жавоб берди:

«Иш шу томонга қараб кетса, ҳайрон бўлмайман. Аммо яна бир бор айтаман: охир-оқибат бундан ким жабр кўради? Футболчилар ва мухлислар».

Янги мавсумда бешта турдан сўнг «Манчестер Сити» 15 очко билан Премьер-лига жадвалида пешқадамлик қилмоқда.