Миланнинг «Интер» клуби ҳужумчиси Лаутаро Мартинес Лионель Мессининг Аргентина миллий терма жамоасидаги фаолиятини якунлашига муносабат билдириб, афсонавий футболчига таъсирли сўзлар билан мурожаат қилди.

39 ёшли Месси 6 октябрдан 7 октябрга ўтар кечаси Аргентина терма жамоаси сафидаги сўнгги учрашувини ўтказди.

Буэнос-Айресда бўлиб ўтган хайрлашув баҳсида аргентиналиклар Бенин терма жамоасини 3:0 ҳисобида мағлуб этди. Месси учрашувдаги барча учта голда бевосита иштирок этиб, иккита голли узатмани амалга оширди ва пенальтидан тўп киритди.

Ўйиндан сўнг Лаутаро Мартинес ижтимоий тармоқда Месси билан тушган суратларини эълон қилиб, унга миннатдорчилик билдирди.

«Биз бу кеча ҳеч қачон келмаслигини истагандик. Аммо сен билан бирга ўтказган барча онларимиз каби, бу кечанинг ҳам ҳар бир лаҳзасидан тўлиқ баҳра олдик.

Сен тарихдаги энг буюк футболчи эдинг, ҳозир ҳам шундайсан ва келажакда ҳам шундай бўлиб қоласан», — деб ёзди Лаутаро Мартинес.

Маълумот учун, Лионель Месси 2005 йилдан буён Аргентина миллий терма жамоаси шарафини ҳимоя қилиб келган.

У миллий жамоа сафида жами 208 та учрашув ўтказиб, 126 та гол уришга муваффақ бўлган.