Лондоннинг «Арсенал» клуби бош директори Ричард Гарлик жамоанинг келгуси йиллар учун белгиланган улкан мақсадлари ҳақида гапирди.

Ўтган мавсумда Микель Артета бошчилигидаги «Арсенал» Англия Премьер-лигасида чемпионликни қўлга киритди ва УЕФА Чемпионлар лигаси финалига қадар етиб борди.

Бироқ Лондон клуби раҳбарияти эришилган натижалар билан чекланиб қолиш ниятида эмас. Гарликнинг таъкидлашича, «Арсенал» яқин йилларда нафақат Англияда, балки бутун футбол оламида етакчи кучга айланишни мақсад қилган.

«Биз бир жойда тўхтаб қололмаймиз. Шунчаки қўл қовуштириб, эришган натижаларимиздан мамнун ҳолда барча ишни уддаладик, деб айта олмаймиз.

Бу йўлимизнинг якуни эмас, аксинча, фақат бошланиши. Биз келгуси йилларда футболда ҳукмронлик қилишни истаймиз», — дея Гарликнинг сўзларини келтиради DailyAFC.

Шу тариқа, «Арсенал» раҳбарияти клубнинг сўнгги муваффақиятларини янада катта натижалар сари ташланган дастлабки қадам сифатида баҳоламоқда.

Эслатиб ўтамиз, «Арсенал» 10 октябрь куни Англия Премьер-лигасининг 6-тури доирасида ўз майдонида «Лидс»ни қабул қилади.

Амалдаги чемпионлар ҳозирда 12 очко жамғарган ҳолда турнир жадвалида иккинчи ўринни эгаллаб турибди.