Londonning «Arsenal» klubi bosh direktori Richard Garlik jamoaning kelgusi yillar uchun belgilangan ulkan maqsadlari haqida gapirdi.
O‘tgan mavsumda Mikel Arteta boshchiligidagi «Arsenal» Angliya Premyer-ligasida chempionlikni qo‘lga kiritdi va UYEFA Chempionlar ligasi finaliga qadar yetib bordi.
Biroq London klubi rahbariyati erishilgan natijalar bilan cheklanib qolish niyatida emas. Garlikning ta’kidlashicha, «Arsenal» yaqin yillarda nafaqat Angliyada, balki butun futbol olamida yetakchi kuchga aylanishni maqsad qilgan.
«Biz bir joyda to‘xtab qololmaymiz. Shunchaki qo‘l qovushtirib, erishgan natijalarimizdan mamnun holda barcha ishni uddaladik, deb ayta olmaymiz.
Bu yo‘limizning yakuni emas, aksincha, faqat boshlanishi. Biz kelgusi yillarda futbolda hukmronlik qilishni istaymiz», — deya Garlikning so‘zlarini keltiradi DailyAFC.
Shu tariqa, «Arsenal» rahbariyati klubning so‘nggi muvaffaqiyatlarini yanada katta natijalar sari tashlangan dastlabki qadam sifatida baholamoqda.
Eslatib o‘tamiz, «Arsenal» 10 oktyabr kuni Angliya Premyer-ligasining 6-turi doirasida o‘z maydonida «Lids»ni qabul qiladi.
Amaldagi chempionlar hozirda 12 ochko jamg‘argan holda turnir jadvalida ikkinchi o‘rinni egallab turibdi.
