Миланнинг «Интер» клуби ҳимоячиси Федерико Димарко жамоасининг жорий мавсумдаги мақсадлари, шахсий натижалари ҳамда жароҳатидан кейинги ҳолати ҳақида фикр билдирди.

Италиялик футболчи А Серия чемпионлиги ва УЕФА Чемпионлар лигаси ғолиблиги ўртасида танлов қилишни истамаслигини таъкидлади. Унинг асосий мақсади жамоа билан янги совринларни қўлга киритишдан иборат.

«Ҳозир мен фақат бугунги кун, янги мақсадлар ва навбатдаги совринлар ҳақида ўйлаяпман.

Италия чемпионлиги ёки Чемпионлар лигаси ғолиблигими? Мен улардан бирини танлашни истамайман», — дея Димарконинг сўзларини келтиради Goal нашри.

Шунингдек, «Интер» ҳимоячиси ўтган мавсумда голли узатмалар бўйича ўрнатган шахсий рекорди ҳақида ҳам тўхталди.

Димарконинг таъкидлашича, индивидуал кўрсаткичлар биринчи навбатда жамоавий ўйин ва футболчилар ўртасидаги ҳамжиҳатлик натижасидир.

«Доим таъкидлаганимдек, шахсий кўрсаткичлар жамоанинг умумий натижаларига боғлиқ.

Кўплаб голли узатмаларни амалга ошириш учун уларни голга айлантира оладиган ҳужумчилар керак.

Омадим бор экан, жамоамизда тўрт нафар кучли ҳужумчи тўп тепмоқда. Бу рекорддан жуда хурсандман», — деди футболчи.

Димарко Италия миллий терма жамоасининг сўнгги учрашувларини ўтказиб юборишига сабаб бўлган жароҳати ҳақида ҳам маълумот берди.

«Ҳозир ўзимни яхши ҳис қиляпман. Тиззамда кичик муаммо бор эди, аммо тикланиш устида ишладим ва соғайдим.

Кейинги учрашувдан бошлаб янада ишончлироқ ҳаракат қила оламанми, буни кўрамиз», — деди Димарко.

Эслатиб ўтамиз, «Интер» 10 октябрь куни Италия А Сериясининг 6-тури доирасида ўз майдонида «Парма»ни қабул қилади.