Мадриднинг «Реал» клуби марказий ҳимоячиси Рауль Асенсио жамоанинг собиқ бош мураббийи Карло Анчелотти билан ишлаган даврларини эслаб, италиялик мутахассисга миннатдорчилик билдирди.
Анчелотти 2021 йилдан 2025 йилга қадар «Реал»ни бошқарган. Кейинчалик у Мадрид клубини тарк этиб, Бразилия миллий терма жамоаси бош мураббийи лавозимини эгаллаган.
23 ёшли Асенсионинг таъкидлашича, айнан Анчелотти унга ишонч билдириб, асосий жамоада ўз ўрнини топишига ёрдам берган.
«Анчелотти ажойиб инсон. У мен учун шунчаки мураббий эмас.
Айнан у менга ишонди, ўз қаноти остига олди ва «Сен биз билан қоласан», деб асосий жамоада қолишимни айтди.
Унинг мен учун қилган барча яхшиликларини ҳеч қачон унутмайман», — деди Асенсио AS нашрига берган интервьюсида.
Бироқ Карло Анчелотти «Реал»ни тарк этганидан кейин испаниялик ҳимоячининг клубдаги фаолияти аввалгидек муваффақиятли кечмаяпти.
Асенсио асосий таркибдаги ўрнини йўқотди. Бунинг устига, яқинда жарроҳлик амалиётини бошдан кечириб, узоқ муддатга сафдан чиқди.
Кутилмаларга кўра, 23 ёшли футболчи 2026 йил охирига қадар майдонга қайта олмайди.
