«Ливерпуль» бош мураббийи Андони Ираола жамоанинг жорий мавсумдаги асосий мақсадлари ва совринлар учун курашиш имкониятлари ҳақида фикр билдирди.
Англия Премьер-лигасининг дастлабки беш туридан сўнг «қизиллар» 9 очко жамғариб, турнир жадвалида олтинчи ўринни эгаллаб турибди.
Испаниялик мутахассиснинг таъкидлашича, «Ливерпуль» мавсум бошида очколар сони ёки турнир жадвалидаги муайян ўрин бўйича аниқ мақсад белгиламаган. Жамоа ҳар бир учрашувда ўз имкониятларини тўлиқ намоён этиб, имкон қадар юқори натижага эришишни кўзламоқда.
«Биз очколар сони ёки турнир жадвалидаги ўрин борасида ўз олдимизга аниқ мақсад қўймаганмиз.
Вазифамиз — мавсумни имкон қадар юқори ўринда якунлаш ва бор салоҳиятимизни намойиш этиш.
Агар футболчиларимизнинг ривожланиши учун зарур тизим ва қулай шароит ярата олсак, совринлар учун курашиш имкониятига эга бўламиз», — дея Ираоланинг сўзларини келтиради Anfield Sector.
Эслатиб ўтамиз, Андони Ираола 2026/27 йилги мавсум бошланиши олдидан «Ливерпуль» бош мураббийи этиб тайинланган эди.
Испаниялик мутахассис ушбу лавозимда нидерландиялик Арне Слотнинг ўрнини эгаллаган.
