Англиянинг «Ливерпуль» клуби Мюнхеннинг «Бавария» жамоаси вингери Майкл Олисени ўз сафига қўшиб олиш имкониятини кўриб чиқмоқда.
Football Insider нашрининг хабар беришича, агар француз футболчисининг келаси ёзда Германия клубини тарк этиши мумкинлиги ҳақида маълумотлар пайдо бўлса, «Ливерпуль» унинг трансфери учун фаол ҳаракат бошлашга тайёр.
Манбага кўра, мерсисайдликлар билан бир қаторда Мадриднинг «Реал» клуби ҳам 24 ёшли футболчининг шартномаси атрофидаги вазиятни диққат билан кузатиб бормоқда.
Аввалроқ Олисе «Бавария» билан имзоланадиган янги шартномасига товон пули эвазига клубни тарк этиш имконини берувчи банд киритилишини хоҳлаётгани хабар қилинган эди.
Футболчи мазкур бандда белгиланадиган товон пули миқдори тахминан 200 миллион евро бўлишини истамоқда.
«Бавария» раҳбарияти эса ўзининг етакчи футболчиларидан бири билан ҳамкорликни узоқ муддатга давом эттириш ниятида. Мюнхенликлар Олисени 2032 йилга қадар жамоада сақлаб қолишни режалаштирмоқда.
Бироқ янги шартнома бўйича музокаралар осон кечмаяпти. Асосий келишмовчилик француз вингерининг шартномага товон пули ҳақидаги бандни киритиш талаби билан боғлиқ.
Шу сабабли «Ливерпуль» ва «Реал» вазиятни кузатишда давом этмоқда. Агар «Бавария» Олисе билан келишувга эриша олмаса ва футболчининг кетиш эҳтимоли юзага келса, икки клуб уни қўлга киритиш учун курашга қўшилиши мумкин.
