Мюнхеннинг «Бавария» клуби ёш футболчиси Леннарт Карл навбатдаги шартномасини узайтирганида маоши сезиларли даражада ошиши мумкин.
Бу ҳақда SPORT BILD нашри хабар бермоқда.
Айни пайтда 18 ёшли футболчи йилига тахминан 2 миллион евро маош олади. Бироқ у ўнг қанотда жамоанинг асосий футболчиларидан бирига айлана олса, бу миқдор кескин ошиши мумкин.
«Бавария» келажакда Карлга бир мавсум учун 10 миллиондан 14 миллион еврогача маош таклиф қилиши эҳтимолдан холи эмас.
Бундай ҳолатда у Майкл Олисе ва Луис Диас каби жамоанинг таниқли футболчилари билан бир хил маош тоифасига киради.
Бу масалада Карлнинг футболчи сифатидаги ривожланиши ҳал қилувчи аҳамиятга эга бўлади.
Ҳозирча «Бавария»нинг ўнг қанотдаги асосий танлови Майкл Олисе бўлиб қолмоқда. Шунингдек, унинг Мюнхен клубида узоқ муддат қолиши кутилмоқда.
Шу сабабли клуб раҳбарияти Карлнинг келгуси йилларда жамоада қандай ўрин эгаллашини аниқлаб олиши керак.
Айни пайтда янги шартнома масаласида шошилишга ҳожат йўқ. Чунки ёш футболчининг амалдаги келишуви 2029 йилгача мўлжалланган.
Бироқ Карлнинг тез суръатларда ривожланаётгани Европанинг бир қатор йирик клублари эътиборини тортган.
Шу боис «Бавария» футболчининг трансфер бозоридаги қиймати янада ошишидан аввал унинг келажагини клуб билан боғлашга интилиши мумкин.
