Матбуот анжуманининг иккинчи қисмида "Локомотив" клуби спорт директори Равшан Муқимов иштирок этди ва журналистларнинг саволларига жавоб берди.

— Бугун ёмон ўйин бўлмади. Яратилган вазиятлардан фойдалана олмадик ва мағлубиятга учрадик. Сўнгги 2-3та ўйиндан бери вазиятларни голга айлантириш борасида муаммоларга дуч келяпмиз.

— "Локомотив"нинг чемпионлик учун курашдаги имкониятларини қандай баҳолайсиз?
— Эртанги ўйинларни кузатамиз. Ҳали ҳеч нарса йўқотмадик. Жамоалар биздан ҳали илгарилаб кетишмади. Ҳали назарий имкониятларни ҳисобламаяпмиз. Олдимизда 5та тур ўйинлари бор.

— Павел Бугало нима учун ўйин қайдномасига киритилмаяпти?
— Бу мураббийлар штабининг қарори, жамоанинг ички иши. У биз билан машғулотларда иштирок этмоқда. Ҳаммаси жойида.

— Нима учун матбуот анжуманига бош мураббий Ҳаким Фузайлов ташриф буюрмади?
— Айни пайтда бош мураббий раҳбарият билан суҳбатлашмоқда. Шунингдек, бироз мазаси ҳам йўқ. Шунинг учун мендан матбуот анжуманида иштирок этишни илтимос қилди.

— Иккинчи даврада "Локомотив"нинг ўйинида пасайиш кузатиляпти. Бунинг сабаби нимада?
— Ўйинимизда пасайиш йўқ, назаримда. Ҳозирги кунда Фарҳод Тожиев ва Садриддин Абдуллаев жароҳат туфайли бизга ёрдам бера олишмаяпти. Шунингдек, Санжар Турсунов ҳам сафимизни тарк этган. Бизнинг ҳозирги кундаги муаммомиз — вазиятларни голга айлантира олмаслик.

— Бугун жамоа нима учун мағлубиятга учради: "Пахтакор" яхши ўйнагани учунми ёки "Локомотив" ёмон ўйнагани учун?
—  "Пахтакор" — кучли жамоа. Биринчи даврада таркиби билан боғлиқ муаммоларга юзага келгани туфайли кўплаб очколар йўқотиб қўйди. "Пахтакор" иккинчи даврада ўзига келиб олиб, яхши ўйин кўрсатмоқда.

— Ҳозирги пайтда учта жамоа — "Бунёдкор", "Насаф" ва "Пахтакор"дан қайси бири тактик жиҳатдан қайси бири кучли?
— Бугунги кунда "Пахтакор" кучлироқ. Бу менинг шахсий фикрим.