«Бавария» кузатув кенгаши аъзоси ва клубнинг фахрий президенти Ули Хёнесс Германия Бундеслигасининг 5-турида «Аугсбург»га қарши учрашувда Мануэль Нойер йўл қўйган хатога муносабат билдирди.

10 октябрь куни бўлиб ўтган баҳс 2:2 ҳисобидаги дуранг билан якунланди. Учрашувнинг олтинчи сониясида Нойернинг хатосидан фойдаланган «Аугсбург» футболчиси Робин Фелльхауэр ҳисобни очди.

Мазкур гол Бундеслига тарихидаги энг тезкор гол сифатида қайд этилди.

Ўйиндан кейин Нойернинг хатоси муҳокамаларга сабаб бўлди. Ули Хёнессдан ушбу вазият дарвозабоннинг «Бавария»даги фаолияти якунига яқинлашаётганини англатадими, деб сўрашди.

«Йўқ, асло бундай эмас. Ҳар бир инсон баъзан хато қилишга ҳақли.

Шунингдек, Жошуа Киммих атрофидаги шунга ўхшаш шов-шувларни ҳам мутлақо бемаъни деб ҳисоблайман.

Ҳозир ҳаддан ташқари кўп мақталаётган футболчилар, аввало, ўз клубларида асосий таркибдан мустаҳкам жой олишлари керак», — деди Хёнесс.

Шу тариқа, «Бавария»нинг фахрий президенти Нойерни ҳимоя қилиб, битта хатога асосланиб тажрибали дарвозабоннинг келажаги ҳақида кескин хулоса чиқаришга қарши эканини билдирди.