Италиянинг «Комо» клуби бош мураббийи Сеск Фабрегас Чемпионлар лигаси умумий босқичининг 2-турида Нидерландиянинг «Фейеноорд» жамоасига қарши ўйинда қайд этилган 2:3 ҳисобидаги мағлубият ҳақида фикр билдирди.

«Улар биздан кучлироқ эди. Бутун ўйин давомида эмас, аммо энг муҳим дақиқаларда шундай бўлди. Эҳтимол, биз ҳам рақибимиз каби шунчаки вазиятлар яратгандирмиз, бироқ улар бироз уюшқоқроқ ҳаракат қилишди.

Чемпионлар лигасида сафарда ҳар қандай рақибга қарши ўйнаш жуда қийин вазифа эканини биламан. Айниқса, ўз миллий чемпионатларида ғалаба қозонишга ўрганган ва устунлик қиладиган жамоаларга қарши ўйнаш осон эмас. Биз олдинга ҳаракат қилишда давом этамиз. Ҳали ишлашимиз ва ўрганишимиз керак бўлган жиҳатлар кўп», — дея Фабрегаснинг сўзларини Ziggo Sport манбасига таянган ҳолда УЕФА расмий сайти келтиради.

Учрашув 14 октябрь куни бўлиб ўтди. «Комо» сафида Диао 18-дақиқада ҳисобни очди. Зехиэл 20-дақиқада мувозанатни тиклади. Ҳож Мусса 52-дақиқада «Фейеноорд»ни олдинга олиб чиқди, Санчес 81-дақиқада ҳисобни 3:1 кўринишига келтирди. Дувикас эса 90+3-дақиқада битта гол фарқини қисқартирди — 3:2.