«Интер» сардори ва ҳужумчиси Лаутаро Мартинес бугун Роццанодаги Гуманитар фанлар институтида клиник ва диагностик текширувлардан ўтди. Бу ҳақда клуб матбуот хизмати хабар берди.
Текширувлар натижасида футболчининг чап сон орқа қисми мушаклари чўзилгани аниқланди.
Ҳужумчи Чемпионлар лигаси доирасида «Брюгге»га қарши ўйинда жароҳат олган эди. Ушбу учрашувда аргентиналик футболчи иккита гол урган.
Клуб матбуот хизмати тикланишнинг аниқ муддатларини маълум қилмади. Бироқ Sky Sport маълумотларига кўра, 29 ёшли аргентиналик ҳужумчи майдонга фақат ноябрь ойидаги терма жамоалар ўйинлари учун белгиланган танаффусдан кейин қайтади. Бу эса Лаутаро Мартинес 31 октябрь куни «Милан»га қарши бўлиб ўтадиган дербини ўтказиб юборишини англатади.
Жорий мавсумда Мартинес 7 та учрашувда 6 та гол урди.
