Италиянинг «Рома» клуби ярим ҳимоячиси Мартен де Рон Европа Чемпионлар лигасида тарихий натижа қайд этиб, афсонавий аргентиналик ҳужумчи Габриэль Батистутанинг рекордини янгилади.

Римликлар Чемпионлар лигаси умумий босқичининг 2-турида Мадриднинг «Реал» клубини қабул қилиб, 3:4 ҳисобида мағлубиятга учради.

Мезбонлар ўз дарвозасидан тўртта тўп ўтказиб юборган бўлса-да, рақиб дарвозасини уч марта ишғол қилишга муваффақ бўлди.

«Рома»нинг голларидан бирига нидерландиялик ярим ҳимоячи Мартен де Рон муаллифлик қилди.

Эътиборлиси, ушбу гол футболчига клуб тарихида қарийб чорак аср давомида сақланиб келган рекордни янгилаш имконини берди.

Де Рон 35 ёшу 199 кунлигида Чемпионлар лигасида гол уриб, мазкур мусобақада «Рома» сафида тўп киритган энг ёши катта хорижлик футболчига айланди.

Аввалги рекорд Габриэль Батистутага тегишли эди. Аргентиналик машҳур ҳужумчи 2002 йилда «Аякс»га қарши учрашувда 33 ёшу 312 кунлигида гол урган ва шундан буён ушбу кўрсаткич бўйича клуб рекордчиси бўлиб келаётган эди.