Ўзбекистон Суперлигасининг 24-туридан ўрин олган «Андижон» — «Қизилқум» (0:1) учрашувидан кейин меҳмонлар бош мураббийи Жамшид Саидов матбуот анжуманида иштирок этди.

— Аввало, бугунги ўйин ҳақида нима дейиш мумкин? Учрашув жуда қийин кечишини билгандик. Айниқса, 12-ўйинчи — минглаб мухлисларнинг қўллаб-қувватлаши остида ҳар қандай жамоа олдинга интилади. Бундай муҳитда ўйнаш исталган жамоа учун қийин. Биз бунга тайёргарлик кўргандик.

Бугун ғалаба қозонганимиздан хурсандман. Футболчиларга майдондаги фидойиликлари учун раҳмат айтмоқчиман. Улар ўзларидан талаб қилинган вазифани бажаришди.

Минг километрдан ортиқ масофани босиб келган мухлисларимизга ҳам миннатдорчилик билдираман. «Андижон» жамоасига эса кейинги ўйинларда омад тилайман.

— Жамшид ака, Самандар Шукруллаевнинг майдонга туширилиши, яъни беш нафар ҳимоячи билан ўйнашингиз ҳисобни сақлаб қолиш учун қилинган ўзгаришмиди?

— Ҳа. Ўзингиз кўрдингиз, футболчиларимиз бироз чарчаб қолишди, «Андижон» эса босимни кучайтира бошлади. Шунинг учун ҳимояда беш нафар футболчи билан ўйнашга ўтдик.

— Захирадан майдонга тушган футболчилар ўйинни қай даражада кучайтира олишди? Масалан, андижонлик ярим ҳимоячи...

— Захирадан тушган футболчимиз ҳам майдонга яхши киришди. Унга ҳужумдан кўра кўпроқ ҳимояда ҳаракат қилиш вазифаси юклатилган эди. Шу сабабли бу ўзгаришни амалга оширдик. Менимча, у ёмон ўйнамади, муваффақиятли ҳаракат қилди.