Якшанба куни Франция чемпионати доирасида «Труа» майдонида қўлга киритилган ғалаба мавсум бошида қийинчиликларга дуч келган «Марсель» учун вазият ўнгланаётганидан дарак бергандек эди.

 

Бироқ Европа лигаси доирасида «Олимпиакос»га қарши «Велодром» стадионида ўтказилган ва 0:1 ҳисобидаги мағлубият билан якунланган учрашувда жамоанинг ҳимоядаги муаммолари ҳамда руҳий беқарорлиги яна бир бор кўзга ташланди.

Натижада аввал «Лилль» ва «Лион» клубларида ишлаган Бруно Женезио «Марсель»нинг сўнгги 60 йилдан ортиқ вақт ичида мавсумдаги дастлабки саккизта ўйиннинг олтитасида мағлуб бўлган илк бош мураббийига айланди. Бундай ҳолат охирги марта 1964/1965 йилги мавсумда Марио Зателли бошқаруви даврида кузатилган эди.

Бундан ташқари, мавсумни бундай омадсиз бошлаш ҳолати 1979/1980 йилги мавсумда қайд этилган бўлиб, ўшанда Франция клуби олий дивизионни тарк этган эди.