Испания Миллий спорт кенгаши (CSD) Ла Лига раҳбари ва Испания Қироллик футбол федерацияси (RFEF) вице-президенти Хавьер Тебаснинг «Реал» клубига нисбатан билдирган фикрлари юзасидан текширув бошлаши мумкин. Бу ҳақда Marca нашри хабар бермоқда.
Эслатиб ўтамиз, Тебас «Реал» клуби телевидениесидаги чиқишларни Йозеф Геббельс усуллари билан таққослаган эди. Шу билан бирга, функционер бу таққослаш нацистик мафкура ёки Мадрид клуби мухлисларига эмас, балки тарғибот усулларига тааллуқли эканини таъкидлаган.
Кейинроқ «Реал» ушбу баёнотлари сабабли Тебасни зудлик билан истеъфога чиқишга чақирди. Ўз навбатида, Ла Лига раҳбари Мадрид клубини «миллий чемпионатни йўқ қилишга» уринишда айблади.
