«Челси» «Страсбург» ва Марокаш терма жамоасининг ўнг қанот ҳужумчиси Жасим Ясинни ўз сафига қўшиб олишга яқин турибди. Бу ҳақда Лондон клубининг собиқ дарвозабонлар мураббийи Кристоф Лоллишон Ouest-France нашрига берган интервьюсида маълум қилди.
«Бугунги кунда Жасим Ясин «Страсбург»да ўйнаяпти, аммо у деярли аллақачон «Челси» футболчисига айланган», — деди Лоллишон.
20 ёшли футболчи 2026 йил бошида Франциянинг иккинчи лигасида иштирок этувчи «Дюнкерк» клубидан «Страсбург»га ўтган. Трансфер қиймати 7 миллион еврони ташкил этган. Ясин эльзасликлар сафида 25 та ўйинда майдонга тушиб, 2 та гол урди ва 4 та голли узатмани амалга оширди. Шунингдек, август ойида «Ланс»га қарши учрашувнинг энг яхши футболчиси деб топилди.
«Страсбург» ва «Челси» BlueCo холдингига тегишли. Агар трансфер амалга ошса, Ясин эльзасликлар клубидан Лондон жамоасига ўтган навбатдаги футболчи бўлади. Аввалроқ Валентин Барко, Мамаду Сарр ва Эммануэль Эмега ҳам шу йўлдан борган эди.
