"Бавария" ҳужумчиси Харри Кейн жамоадоши Майкл Олисeнинг яқиндаги четлатилишдан кейинги муносабатини юқори баҳолади.

Франциялик футболчи Чемпионлар лигасининг "Викинг"га қарши ўтган учрашувида рақибнинг провакацияга учиб, қўпол хатога йўл қўйган ва қизил карточка олган эди. Бир киши кам бўлиб қолган мюнхенликлар Норвегиядаги баҳсда ғалабали ҳисобни сақлаб қола олмади — 3:3.

Шанба куни эса Олисе "РБ Лейпциг"га қарши учрашувда битта гол уриб, битта голли узатмани амалга оширди ва жамоасининг 6:1 ҳисобидаги йирик ғалабасига ҳисса қўшди.

"Майкл четлатилишдан кейин ҳам машғулотларда, ҳам бугунги ўйинда ажойиб муносабат намойиш этди. Албатта, сешанба куниги воқеадан кейин у қаттиқ хафа бўлганди.

У ҳар бир учрашувда майдонга тушишни хоҳлайди ва "Арсенал"га қарши ҳам ўйнашни истаганди. Аммо ҳаёт шундай.

Биз бу мавсумда унинг қанчалик яхши ўйнаётгани ҳақида кўп гапирдик. Бугун эса у ўзининг юқори савиясини яна бир бор исботлади", — деди Кейн Sport1 нашрига берган интервьюсида.

"Бавария" ва "Арсенал" ўртасидаги учрашув чоршанба куни бўлиб ўтади. Олисе дисквалификация сабабли мазкур баҳсни ўтказиб юборади.