«Бетис» бош мураббийи Мануэль Пеллегрини «Барселона»га қарши учрашувдаги 2:5 ҳисобидаги мағлубиятдан сўнг ҳакамликдан норозилигини билдирди.

Чилилик мутахассис ўйин давомида қабул қилинган айрим қарорларни кескин танқид қилди.

«Бизнинг голимиз бекор қилингани ҳақида нима дейман? Ҳа, тўп қўлга теккан. Аммо бу ҳолат гол урилишидан 30 сония олдин содир бўлган. Агар Жерар Мартин футболчимизнинг орқасидан туртмаганида, тўп қўлга тегмаган бўларди.

Ҳакамнинг иши — шунчаки шармандалик. У футболни умуман тушунмайди.

Қизил карточка эса бизни бутунлай синдирди. Ҳа, эҳтимол, футболчимизнинг ҳаракатлари тажовузкор бўлгандир, аммо Ямал провокация қилди. Футболчимиз шунчаки ўша ҳаракатга жавоб қайтарди.

Ҳакам ҳар икки футболчига сариқ карточка кўрсатиб, ўйинни давом эттириши керак эди.

Бундан ташқари, «Барселона»нинг голларидан бири олдидан қоидабузарлик қайд этилмади. Кейин ўша вазиятни қайта кўриб чиқинглар», — деди Пеллегрини матбуот анжуманида. Унинг сўзларини The Touchline нашри келтирмоқда.

Айни пайтда «Бетис» Испания Ла Лигаси мусобақа жадвалида учинчи ўринни эгаллаб турибди.