«Бетис» футболчиси Фран Гарсия Испания чемпионати доирасида «Барселона»га қарши ўтказилган учрашув натижаси ҳақида фикр билдирди. Мазкур баҳс каталонияликларнинг 5:2 ҳисобидаги ғалабаси билан якунланди.

«Ҳафсаламиз пир бўлди, ғазаб ва аламдамиз... Буларнинг барчасига учрашув қандай якунлангани сабаб бўлди. Энди олдинга қараб ҳаракат қилишимиз керак. Уч кундан кейин бизни муҳим ўйин кутмоқда. Яна ўз мухлисларимиз қаршисида майдонга тушамиз ва қисқа вақт ичида ўзимизни ўнглаб олишимиз лозим», — дея Гарсиянинг сўзларини келтиради Marca нашри.

«Биз «Барселона» тўп билан ҳам, тўпсиз ҳам рақибга кучли босим ўтказишини яхши биламиз. Шунинг учун бир-биримизга ёрдам бериб, ихчам ҳаракат қилишимиз ва жамоа чизиқлари ўртасидаги масофани сақлашимиз керак эди. Бу орқали майдоннинг муҳим ҳудудларида сон жиҳатидан устунликка эришиш ёки ҳеч бўлмаганда кучлар мувозанатини таъминлаш мумкин эди.

Ҳатто бир футболчимиз майдондан четлатилганидан кейин ҳам жамоамиз ўзини йўқотиб қўймади ва курашишда давом этди.

Мухлисларимизга миннатдорчилик билдирмоқчиман. Уларнинг қўллаб-қувватлаши туфайли ўз майдонимизда янада кучлироқ бўлишимиз керак», — деди футболчи.

Айни пайтда «Бетис» Испания Ла Лигасида 19 очко жамғарган ҳолда мусобақа жадвалида учинчи ўринни эгаллаб турибди.

Жамоа навбатдаги учрашувини 21 октябрь куни Чемпионлар лигаси доирасида Нидерландиянинг «Фейеноорд» клубига қарши ўтказади.