«Бетис» ҳимоячиси Эктор Бельерин Испания Ла Лигасининг 9-тури доирасида «Барселона»га қарши ўтказилган учрашувдан сўнг журналистларга ўз фикрларини билдирди. Мазкур баҳс каталонияликларнинг 5:2 ҳисобидаги ғалабаси билан якунланди.

Учрашувнинг 54-дақиқасида Факундо Берналь қизил карточка олиб, майдондан четлатилди ва мезбонлар бир киши кам бўлиб қолишди. Шунингдек, 43-дақиқада «Бетис»нинг голи тўп қўлга теккани сабабли бекор қилинди.

«Менимча, биринчи бўлимда ва иккинчи бўлим бошида яратилган вазиятлар бўйича ўйин тенг кечди. Биз «Барселона»дек кучли жамоага қарши баҳсда маълум даражада ўйинни назорат қила олдик.

Бироқ бир нечта адолатсиз қарорлар қабул қилинди. Футболчимиз туртилганидан кейин тўп унинг қўлига тегди. Хавфли ўйин билан боғлиқ вазиятлар ҳам бўлди. Бундай ҳолатлар учун ҳакамлар турлича жазо қўллашмоқда», — дея Бельериннинг сўзларини келтиради Marca нашри.

«Мен Факундо билан гаплашдим. У жамоадан узр сўрамоқда. Бир киши кам бўлиб қолганимиздан кейин бундай юқори савияли футболчиларга эга жамоага қарши ўйнаш жуда қийин бўлди.

Шунга қарамай, биз сўнгги дақиқаларгача қаршилик кўрсатдик. Тўлиқ таркибда ўйнаганимизда, энг кучли жамоалар билан ҳам рақобатлаша олишимизни исботладик. Барча қийинчиликларга ва бизга қарши бўлган ҳамма нарсага қарамай, курашдик», — деди ҳимоячи.

Ушбу учрашувдан сўнг «Бетис» 19 очко билан Испания чемпионати мусобақа жадвалида учинчи ўринни эгаллаб турибди.