Журналист Экрем Конур ижтимоий тармоқларда хабар беришича, «Манчестер Сити»нинг қанот ҳимоячиси Матеус Нунес каталониялик «Барселона» клубининг трансфер мақсадлари рўйхатига киритилган.
Манбанинг таъкидлашича, португалиялик футболчини ўз сафига қўшиб олишга «кўк-анорранглилар»дан ташқари Англия Премьер-лигасининг бир нечта клублари ҳам қизиқиш билдирмоқда.
Нунес жорий мавсумда Англия чемпионатида бешта учрашув ўтказди.
28 ёшли қанот ҳимоячиси 2023 йилдан буён «Манчестер Сити» шарафини ҳимоя қилиб келмоқда. Матеуснинг «шаҳарликлар» билан амалдаги шартномаси 2028 йил июнь ойининг охирида тугайди. Transfermarkt портали экспертлари португалиялик футболчининг қийматини 45 миллион евро деб баҳоламоқда.
