«Манчестер Юнайтед» сардори Бруну Фернандеш қишки трансферлар ойнасида жамоани тарк этиши мумкин. Португалиялик ярим ҳимоячининг шартномаси билан боғлиқ ноаниқликлар фонида Туркиянинг «Галатасарой» клуби уни ўз сафига қўшиб олиш имкониятини кўриб чиқмоқда.

The Peoples Person нашрининг Туркиянинг Fanatik газетасига таяниб хабар беришича, Фернандеш «Манчестер Юнайтед»нинг ҳозирги ривожланиш йўналишидан норози. Футболчи клуб раҳбарияти жамоанинг келажаги борасида аниқроқ режа ва мақсадларни тақдим этиши керак, деб ҳисобламоқда.

Манба маълумотларига кўра, португалиялик ярим ҳимоячи «Манчестер Юнайтед»нинг янги шартнома бўйича таклифини рад этган ва январь ойида клубни тарк этиш истагини билдирган.

Ўз навбатида, «Галатасарой» Бруну Фернандешни ўз сафига қўшиб олиш учун таркибда ўзгаришлар қилишга тайёр.

Хабар қилинишича, Истанбул клуби португалиялик футболчига жой бўшатиш мақсадида германиялик қанот ҳужумчиси Лерой Саненинг кетишига рози бўлиши мумкин.

Бироқ Фернандешнинг келажаги ҳозирча ноаниқлигича қолмоқда.

The Peoples Person нашри футболчининг «Манчестер Юнайтед»дан кетиши ҳақидаги хабарлар ҳозирча тахминларга асосланганини таъкидлаган.

Бундан ташқари, аввалги маълумотларда Фернандеш ва манкунианликлар ўртасида янги шартнома борасидаги музокаралар ҳамон давом этаётгани айтилган.

Шу сабабли 31 ёшли португалиялик ярим ҳимоячининг қишки трансферлар ойнасида «Галатасарой»га ўтиши ҳозирча тасдиқланмаган.