Нукуснинг “Арал” футбол клуби муддатидан олдин Суперлига-2027 йўлланмасини қўлга киритди. Жамоа сўнгги бор 25 йил аввал мамлакатнинг олий дивизионида иштирок этган эди.

Пролиганинг 23-турида “Арал” Қорақалпоғистон давлат университетининг “ҚМУ Жайхун” жамоасига қарши майдонга тушди. Учрашувда нукусликлар 2:0 ҳисобида ғалаба қозониб, Суперлигага тўғридан тўғри йўлланмани нақд қилди.

Баҳснинг 17-дақиқасида Асадбек Мустафоқулов ўз дарвозасига гол уриб, “Арал”ни ҳисобда олдинга олиб чиқди. Учрашув якунланишига етти дақиқа қолганида Марк Краснов рақиб дарвозасини ишғол этиб, жамоасининг ғалабасини мустаҳкамлади.

“Арал” учун жорий мавсум муваффақиятли кечмоқда. Жамоа Пролигада ўтказган 23 та учрашувнинг фақат биттасида мағлубиятга учради. Барқарор натижалар эвазига нукусликлар мавсум якунланишига бир неча тур қолганида Суперлигага чиқиш вазифасини уддалади.