«Бавария» ҳужумчиси Харри Кейн Германия Бундеслигасида 1967 йилдан буён сақланиб келаётган тарихий рекордни янгилади.

Англиялик футболчи Германия чемпионатидаги 100-учрашувини гол билан нишонлади. Мюнхенликлар эса мазкур баҳсда рақибини 6:1 ҳисобида мағлуб этишди.

Эътиборлиси, Кейн Бундеслигада ўтказган дастлабки 100 та учрашувида 102 та гол уришга муваффақ бўлди.

Бу Германия чемпионати тарихида илгари кузатилмаган натижа ҳисобланади.

Бунга қадар мазкур кўрсаткич бўйича рекорд Фридхельм Коницкага тегишли эди. У Бундеслигадаги дастлабки 100 та ўйинида 72 та гол урган ва унинг рекорди 1967 йилдан буён янгиланмай келаётганди.

Шу тариқа, Кейн 59 йиллик рекордни янгилаб, Германия чемпионати тарихидан жой олди.

Фридхельм Коницка Германиянинг собиқ футболчиси ва мураббийи бўлиб, «Тимо» лақаби билан танилган. Унга бундай лақаб совет маршали Тимошенкога ташқи ўхшашлиги сабабли берилган.

Коницка футболчилик фаолияти давомида Дортмунднинг «Боруссия» ва «Мюнхен 1860» клублари шарафини ҳимоя қилган.

У Германия чемпионатида жами 218 та учрашув ўтказиб, 164 та гол киритган.