Франция терма жамоасининг собиқ ҳимоячиси, 1998 йилги жаҳон чемпиони Биксант Лизаразю 2026 йилги «Олтин тўп» мукофотига ким муносиб экани ҳақида фикр билдирди.
Нуфузли мукофотни топшириш маросимига бир ҳафта қолди. Тантанали тадбир 26 октябрь куни Лондонда бўлиб ўтади.
Лизаразюнинг фикрича, «Барселона»нинг ёш юлдузи Ламин Ямал мазкур совринни қўлга киритишга энг муносиб футболчи ҳисобланади.
«Мен доимо ўз мезонларимга амал қилишга ҳаракат қиламан. Биринчи мезон — жамоавий ютуқлар.
Ортимизда иккита жуда муҳим мусобақа — Чемпионлар лигаси ва жаҳон чемпионати ўтказилган мавсум қолди.
Шу сабабли асосий даъвогарлар қаторида Хвича Кварацхелия, Ламин Ямаль ва Усмон Дембелени кўраман.
Иккинчи мезон эса футболчининг майдондаги даҳолиги. Бу борада мен учун фақат битта номзод бор — Ямал.
Унинг сўнгги пайтларда майдонда кўрсатаётган ўйинини бир кўринг. Унинг даражаси янада ошди.
Тўғри, Ямал 2026 йилги жаҳон чемпионатида қандайдир фавқулодда ўйин намойиш этмади. Аммо у барибир жаҳон чемпиони бўлди, Испания чемпионлигини қўлга киритди.
У феноменал футболчи», — дея Лизаразюнинг сўзларини келтиради Actu Foot.
Эслатиб ўтамиз, 2025 йилги «Олтин тўп» мукофоти Усмон Дембелега насиб этган эди.
Ламин Ямал эса ўша йилги овоз бериш натижаларига кўра иккинчи ўринни эгаллаган.
