«Севилья» ҳимоячиси Кике Салас Испания чемпионатида «Реал»га қарши кечган учрашувда (1:4) Арда Гюлер майдондан четлатилиши керак бўлганини таъкидлади.

Баҳсли вазият биринчи бўлимнинг 23-дақиқасида юз берди. Гюлер тўп учун кураш пайтида Пекенинг юзига тирсаги билан зарба берди. Рақиб футболчиси майдонга қулаганига қарамай, бош ҳакам туркиялик ярим ҳимоячига ҳатто сариқ карточка ҳам кўрсатмади.

Орадан етти дақиқа ўтиб, Гюлер ҳисобни очди. 37-дақиқада эса Килиан Мбаппе мадридликларнинг устунлигини оширди.

«Гюлер Пекега зарба бергунига қадар ўйин бизнинг назоратимизда эди. Бу аниқ қизил карточка! Агар у майдондан четлатилганида, ҳаммаси бошқача бўлиши мумкин эди.

Нима учун ҳакам видеотакрорни кўришга бормаганини тушунмайман. Пекенинг айтишича, Гюлер унинг юзига тирсаги билан зарба берган», — дея Саласнинг сўзларини келтиради Madrid Zone.