«Ювентус» бош мураббийи Лучано Спаллетти жамоа сардори Глейсон Бремернинг айрим футболчиларга нисбатан билдирган танқидий фикрларига муносабат билдирди.

Италия чемпионатининг 7-турида «Лацио»дан 0:3 ҳисобида мағлубиятга учраган туринликлар сардори жамоадошларининг масъулиятга бўлган муносабатидан норози эканини яширмаганди.

«Мураббий кўрсатмалар беради, аммо майдонга биз чиқамиз. Асосий таркибда 11 нафар футболчи ўйнайди, яна беш нафари захирадан қўшилади. Мен эса ҳаммани бир ўзим етаклаб юра олмайман.

Ҳеч кимни айбламоқчи эмасман, лекин ҳар кимнинг характери ҳар хил. Ишлар ёмон кетганда айримлар масъулиятни ўз зиммасига олади, бошқалар эса аксинча, ўзини четга тортади», — деганди Бремер Sky нашрига берган интервьюсида.

Спаллетти эса сардорининг бу фикрларига жавоб қайтариб, мағлубият учун барча бирдек масъул эканини таъкидлади.

«Бремернинг вазиятни таҳлил қилаётгани яхши. Аммо у ҳам бугунги учрашувда иштирок этди, худди мен каби.

Шунинг учун жамоа ҳақида гапиришдан аввал ўзимиз ҳақимизда гаплашиб олишимиз керак. Бремер ҳам бугунги ўйинимиз учун масъуллардан бири. Бошқа барча футболчилар каби у ҳам ушбу натижанинг бир қисми», — деди Спаллетти.

Эслатиб ўтамиз, «Ювентус» ушбу мағлубиятдан кейин 11 очко билан Италия А Серияси турнир жадвалида саккизинчи ўринни эгаллаб турибди.