Лондоннинг «Арсенал» клуби 2019 йилда Микель Артетани бош мураббий этиб тайинлашдан аввал бир қатор таниқли мутахассислар номзодини кўриб чиққани маълум бўлди.
The Telegraph нашрининг хабар беришича, лондонликлар рўйхатида Маурисио Почеттино, Карло Анчелотти, Массимилиано Аллегри, Патрик Виейра, Роберто Мартинес, Витор Перейра ва Юлиан Нагельсман каби мураббийлар бўлган.
Қизиғи, Артета дастлаб асосий номзод ҳисобланмаган. Испаниялик мутахассис футболчилик фаолиятини якунлагач, «Манчестер Сити»да Пеп Гвардиолага ёрдамчилик қилган, аммо мустақил равишда жамоа бошқариш тажрибасига эга эмасди.
Бироқ Артетани «Арсенал»даги футболчилик фаолиятидан яхши таниган клуб ходимлари ўша пайтдаги спорт директори Эду Гаспарни унга имконият беришга кўндиришган.
Гаспар Артета билан ўтказилган суҳбатни шундай эслади:
«У шу қадар пухта тайёргарлик кўргандики, гўё аллақачон клубда ишлаётгандек таассурот қолдирди. Микель ўз стратегияси ва “Арсенал”нинг келажагини қандай тасаввур қилиши ҳақида батафсил гапириб берди.
Ўшанда ўзимга: “Вой, бу йигитнинг тайёргарлиги мутлақо бошқа даражада экан”, дегандим.
Номзодларни танлаш жараёни якунлангач, қарор қабул қилиш осон бўлди. Чунки Микель деярли барча мезонлар бўйича энг яхши номзод эканини кўрсатди», — деди Гаспар.
Натижада Артета 2019 йилнинг декабрь ойида «Арсенал» бош мураббийи этиб тайинланди. Орадан қарийб беш йил ўтиб, у лондонликларни узоқ кутилган Англия чемпионлиги сари етаклади.
