"Астон Вилла" аргентиналик ярим ҳимоячи Эмилиано Буэндиа билан ҳамкорликни давом эттиришга яқин турибди. Томонлар янги шартнома бўйича музокараларнинг якуний босқичига етиб келишган.

Mail Sport нашрининг хабар беришича, сўнгги бир неча кун давомида ўтказилган музокараларда сезиларли ижобий ўзгаришлар кузатилган. Клуб ва 29 ёшли футболчи келишув муддатини 2029 йил ёзигача узайтиришга яқин.

Буэндианинг амалдаги шартномаси жорий мавсум охирида ниҳоясига етади. Янги келишув имзоланса, аргентиналик ярим ҳимоячи яна икки мавсум давомида Бирмингем клуби шарафини ҳимоя қилади.

Сўнгги бир йил Буэндиа учун муҳим давр бўлди. Футболчи асосий таркибдаги ўрнини қайта қўлга киритиб, бош мураббий Унаи Эмерининг ишончини қозонишга муваффақ бўлди.

Айниқса, жорий мавсумдаги барқарор ўйинлари унинг жамоадаги мавқеини янада мустаҳкамлади. Аргентиналик футболчи "Астон Вилла"нинг Премьер-лигадаги барча учрашувларини асосий таркибда бошлаган.

Буэндианинг муваффақиятли ҳаракатлари клуб раҳбариятини у билан узоқ муддатли ҳамкорликни давом эттиришга ундаган.

Маълумотларга кўра, томонлар ўртасидаги музокаралар ижобий кечмоқда ва яқин орада янги шартнома бўйича якуний келишувга эришилиши мумкин.