«Манчестер Юнайтед»нинг собиқ бош мураббийи Эрик тен Хаг клуб раҳбарияти Скотт Мактоминейни унинг розилигисиз сотиб юборганини маълум қилди.
Нидерландиялик мутахассис шотландиялик ярим ҳимоячининг трансферига қарши бўлганини, аммо раҳбарият барибир футболчини сотишга қарор қилганини таъкидлади.
«Менинг ҳафсалам пир бўлганди. Скотт Мактоминайни сотмасликни сўраганимда, биз бу борада келишиб олгандик.
Мен жамоада гол урадиган футболчилар етишмаслигини айтганман. Скотт эса голлар ва самарали узатмалар орқали жамоага фойда келтираётганди.
«Манчестер Юнайтед» унинг қонида бор. Мендан фикримни сўрашганида, унинг сотилишига қарши эканимни билдирганман.
Аммо якунда уни барибир сотиб юборишди», — деди тен Хаг The Athletic нашрига берган интервьюсида.
Скотт Мактоминей «Манчестер Юнайтед» тарбияланувчиси ҳисобланади. Шотландиялик ярим ҳимоячи 2024 йилда «Наполи» клубига кўчиб ўтган.
Эрик тен Хаг эса 2022–2024 йилларда «Манчестер Юнайтед» бош мураббийи лавозимида ишлаган. У Англия клуби билан иккита совринни қўлга киритган.
