«Ювентус» вингери Франсишку Консейсау «Лацио»га қарши учрашувда олган жароҳати сабаб тахминан уч ҳафта майдонга туша олмайди.

Португалиялик футболчи Италия А Серияси доирасидаги баҳсда чап елкасини чиқариб олган.

Душанба куни эрталаб Консейсау J|Medical тиббиёт марказида текширувдан ўтди. Таҳлиллар футболчининг елка бўғими чиққанини тасдиқлади.

«Ювентус» матбуот хизмати жароҳат юзасидан расмий баёнот эълон қилди.

«Франсишку Консейсау «Лацио»га қарши учрашувда чап елкасидан жароҳат олгани сабаб бугун эрталаб J|Medical тиббиёт марказида диагностик текширувлардан ўтди.

Текширувлар елка бўғими чиққанини кўрсатди. Бўғим ўйин бўлиб ўтган кечанинг ўзида жойига солинган эди.

Футболчи жарроҳлик амалиётисиз, консерватив усулда даволанади. У мусобақаларга қайтиш мақсадида тикланиш жараёнини аллақачон бошлаган», — дейилади клуб баёнотида.

Консейсаунинг тахминан уч ҳафта давомида майдонга тушмаслиги кутилмоқда.

Португалиялик вингер халқаро терма жамоалар ўйинлари учун ажратилган танаффусдан сўнг сафга қайтиши мумкин.