«Барселона» ҳужумчиси Ламин Ямал жорий мавсумда клуб сафида барча мусобақалар доирасида 10 та гол ва 10 та голли узатмани ўз ҳисобига ёзиб қўйди. Шу тариқа у Европа топ-5 чемпионатлари вакиллари орасида ҳар икки кўрсаткич бўйича икки хонали натижага эришган биринчи футболчига айланди. Бу ҳақда Opta статистик портали X ижтимоий тармоғида хабар берди.
Испаниялик футболчи мавсумдаги 10-голини Чемпионлар лигаси 2026/2027 йилги мавсуми умумий босқичининг 3-турида «ПСЖ»га қарши учрашувда урди. Парижда бўлиб ўтган баҳсда «Барселона» 2:4 ҳисобида мағлуб бўлди.
19 ёшли Ямал жорий мавсумда Чемпионлар лигасида иккита гол ва тўртта голли узатмани амалга оширган.
Маълумот учун, Европа топ-5 чемпионатларига Англия, Испания, Италия, Германия ва Франция миллий чемпионатлари киради.
Шунингдек, 19 ёшли испаниялик футболчининг жорий мавсумда клуби ва терма жамоаси сафида натижаларини қўшиб ҳисоблаганда, 14 та гол ва 11 та ассист муаллифи бўлган.
«Барселона» Испания чемпионатининг 10-турида 25 октябрь куни ўз майдонида «Реал»га қарши баҳс олиб боради.
