Лондоннинг «Арсенал» клуби дарвозабони Давид Райя Чемпионлар лигасида «Бавария»га қарши ўйин олдидан Мануэль Нойер ҳақидаги фикрларини билдирди.

Учрашув бугун Мюнхенда бўлиб ўтади. Бош ҳакамнинг старт ҳуштаги 22 октябрга ўтар кечаси Тошкент вақти билан соат 00:00 да янграйди.

«Нойернинг барча жиҳатлари менга ёқади. Мануэль — футбол афсонаси, у жуда катта ютуқларга эришган. У ҳақда фақат яхши гапларни айта оламан.

У доимо ёш дарвозабонлар учун ўрнак бўлиб келган, мен ҳам унга ўхшашга ҳаракат қилганман. У билан бир майдонда ўйнаш мен учун катта шараф. Умид қиламанки, у соғлом ва бизга қарши учрашувда майдонга туша олади», — деди Райя матбуот анжуманида. Унинг сўзларини Bayern & Germany келтирмоқда.

Мануэль Нойернинг «Арсенал»га қарши учрашувда иштирок этиши ҳамон сўроқ остида. Мюнхенликларнинг 40 ёшли сардори жароҳати сабабли жамоасининг аввалги ўйинини ўтказиб юборган эди.