«Бетис» футболчиси Факундо Берналь Ламин Ямалга ҳужум қилгани учун узоқ муддатли дисквалификацияга учради.
Ла Лиганинг 9-туридан ўрин олган «Бетис» ва «Барселона» ўртасидаги учрашувнинг (2:5) 54-дақиқасида 23 ёшли ярим ҳимоячи бош ҳакам Рикардо де Бургос Бенгоэчеа томонидан майдондан четлатилган эди.
Уругвайлик футболчи ва «Барселона» вингери Ламин Ямал ўртасида жанжал келиб чиқди. Вазият «Бетис» дарвозабони Альваро Вальес Севилья жамоасининг голли ҳужуми вақтида рақибнинг икки футболчиси билан тўқнашиб, майдонга йиқилган Фермин Лопесни ўрнидан турғизишга ҳаракат қилганидан кейин бошланган.
Бернал Ямални итариб юборди, Ламин эса унга жавоб қайтарди. Шундан сўнг Факундо испаниялик футболчининг бўйнидан ушлаб, боши билан унинг бошига бир неча марта зарба берди. Ямал юзини қўллари билан ёпган ҳолда майдонга йиқилди.
Ҳакам Бенгоэчеа Берналга тўғридан-тўғри қизил карточка кўрсатди, Ямал эса сариқ карточка билан огоҳлантирилди.
Бугун Испания қироллик футбол федерацияси (RFEF) интизом қўмитаси Бернални тўртта ўйинга дисквалификация қилди.
Ушбу қарорга ҳакамнинг расмий баённомаси асос бўлди. Унда ҳодиса «юзга бош билан икки марта зарба бериш» сифатида таърифланган.
«Факундо Бернал қуйидаги сабабга кўра майдондан четлатилди: у жанжал вақтида рақибини бўйнидан ушлаб, тўп ўйинда бўлмаган пайтда унинг юзига боши билан кетма-кет икки марта зарба берди. Рақиб футболчиси тиббий ёрдамга муҳтож бўлмади ва учрашувда иштирок этишни давом эттира олди», — дейилади ҳакам баённомасида.
«Бетис»нинг эътирозлари рад этилди. Клуб баённомада «аниқ фактик хато» мавжудлигини таъкидлаган. Севильяликлар фикрича, ҳужумдан олдинги вазият ва унда Ямалнинг иштироки ҳужжатда тўғри акс эттирилмаган, шунингдек, баённомада қайд этилган «ҳужум» ўз тасдиғини топмаган.
«Бетис» қизил карточкани бекор қилишни ёки Ламин томонидан амалга оширилган провокацияни жазони енгиллаштирувчи ҳолат сифатида инобатга олишни сўраган. Бироқ бу далиллар ҳам рад этилган.
Бернал Испания чемпионатида «Сельта», «Малага» ва «Эльче»га қарши бўлажак учрашувларни ўтказиб юборади.
Бундан ташқари, қоидабузарлик «жиддий» деб таснифлангани сабабли, у Испания кубоги биринчи босқичида «Навалькарнеро»га қарши ўйинда ҳам иштирок эта олмайди.
Бироқ бу ҳолат Берналга дисквалификация муддатини эртароқ ўтаб бўлиш имконини беради. Натижада у «Севилья»га қарши дербида майдонга тушиши мумкин.
