Мадриднинг "Реал" клуби ҳужумчиси Винисиус Жуниор фаолиятида юзага келган вазият ҳақида фикр билдирди.
Яқинда бразилиялик футболчи Испания чемпионатида тўртта ўйинга дисквалификация қилинган эди.
"Ҳар бир лаҳза билан яшаш керак. Ҳаммаси ўтиб кетади", — дея Винисиуснинг сўзларини келтиради инсайдер Фабрицио Романо ижтимоий тармоқдаги саҳифасида.
Винисиус Чемпионлар лигаси умумий босқичида "РБ Лейпциг"га қарши кечган учрашувда ҳам иштирок этди. "Реал" 4:1 ҳисобида ишончли ғалабага эришган баҳсда бразилиялик футболчи гол ура олмади ва иккинчи бўлим ўрталарида захирага олинди.
Мадридликлар навбатдаги учрашувини Испания чемпионати доирасида "Барселона"га қарши ўтказади.
