Европа лигаси 2026/2027 йилги мавсуми умумий босқичининг 3-туридан ўрин олган «Борнмут» (Англия) ҳамда «Милан» (Италия) жамоалари ўртасидаги учрашув ўз якунига етди. Борнмут шаҳридаги «Виталити» стадионида бўлиб ўтган баҳсда мезбонлар 3:0 ҳисобида ғалаба қозонди.

Учрашувнинг 8-дақиқасида Жастин Клюйверт пенальтини аниқ амалга ошириб, «Борнмут»ни ҳисобда олдинга олиб чиқди. 28-дақиқада эса «Милан» дарвозабони Мик Меньян қизил карточка олиб, майдондан четлатилди.

32-дақиқада Маркус Тавернье ҳам пенальтидан унумли фойдаланиб, мезбонларнинг устунлигини икки карра оширди. Учрашувдаги якуний ҳисобни 84-дақиқада Амин Адли ўрнатди — 3:0.

Европа лигаси умумий босқичининг 4-турида «Борнмут» 5 ноябрь куни сафарда Праганинг «Спарта» клубига қарши майдонга тушади. Шу куни «Милан» ўз майдонида «Ференцварош»ни қабул қилади.

Эслатиб ўтамиз, Европа лигасининг амалдаги ғолиби — «Астон Вилла». Бирмингем клуби ўтган мавсум финалида «Фрайбург»ни 3:0 ҳисобида мағлуб этган эди.

Европа лигаси, умумий босқич, 3-тур
«Борнмут» (Англия) — «Милан» (Италия) — 3:0
Голлар: 1:0 — Жастин Клюйверт, 8-дақиқа (пенальти). 2:0 — Маркус Тавернье, 32-дақиқа (пенальти). 3:0 — Амин Адли, 84-дақиқа.
Қизил карточка: Мик Меньян («Милан»), 28.