Лондоннинг "Арсенал" клуби ярим ҳимоячи Деклан Райс билан ҳамкорликни узайтириш арафасида турибди.

Now Arsenal нашрининг ижтимоий тармоқларда тарқатган маълумотига кўра, клуб ва футболчи ўртасида янги шартнома бўйича музокаралар якуний босқичга етган. Келишув расман яқин вақт ичида эълон қилиниши кутилмоқда.

Англиялик ярим ҳимоячи 2023 йил ёзидан буён "Арсенал" шарафини ҳимоя қилиб келмоқда. У жамоа марказий чизиғининг асосий футболчиларидан бири ҳисобланади ва Англия Премьер-лигаси ҳамда Чемпионлар лигасидаги деярли барча учрашувларда мунтазам майдонга тушмоқда.

Райснинг лондонликлар билан амалдаги шартномаси 2028 йил ёзига қадар мўлжалланган.

Эслатиб ўтамиз, ярим ҳимоячи ҳафта ўртасида ўтказилган Чемпионлар лигасининг "Бавария"га қарши учрашувида ҳам муҳим роль ўйнади.

Мюнхенда кечган баҳснинг иккинчи бўлими охирларида Райс гол уриб, "Арсенал"га 2:2 ҳисобидаги дурангни таъминлади. Шу тариқа, "канонирлар" Германия сафаридан бир очко билан қайтди.