"Барселона" "Манчестер Сити"нинг ҳужумкор ярим ҳимоячиси Райан Шеркини ўз сафига қўшиб олиш имкониятини кўриб чиқмоқда.
El Nacional нашрининг хабар беришича, франциялик футболчи Манчестер клубига молиявий қоидаларни бузгани учун жиддий санкциялар қўлланган тақдирда, каталонияликлардан тушадиган таклифни кўриб чиқишга тайёр.
Айни пайтда "Манчестер Сити"га нисбатан эҳтимолий жазолар ва бунинг ортидан жамоа юлдузларининг сотилиши мумкинлиги ҳақида хабарлар тарқалмоқда.
Бундай вазиятда "Барселона" нафақат Эрлинг Холанд, балки Райан Шеркини ҳам ҳужум чизиғини кучайтириш учун муносиб номзод сифатида кўрмоқда.
"Шеркининг асосий устунлиги унинг ижодкорлигида. У чизиқлар орасида бўш ҳудудларни топиш, рақибларни алдаб ўтиш ва ҳал қилувчи узатмаларни амалга ошириш қобилиятига эга. Унинг фазилатлари зич ҳимояни ёриб ўтиш ва комбинацион ўйинни ривожлантиришда қўшимча имконият яратади", — дейилади манба хабарида.
Шу билан бирга, эҳтимолий трансфер "Барселона" таркибидаги ўзгаришларга ҳам сабаб бўлиши мумкин.
Маълумотларга кўра, каталонияликлар Шеркини харид қилиш учун зарур маблағни Фермин Лопеснинг сотувидан тушган пул орқали қоплаш имкониятини кўриб чиқиши мумкин.
