Лондоннинг "Арсенал" клуби ҳужум чизиғини кучайтириш учун Италиянинг "Монца" жамоаси тўпурари Густаво Варелани ўз сафига қўшиб олиш имкониятини кўриб чиқмоқда.
Arsenal Radar нашрининг хабар беришича, "канонирлар" скаутлари 21 ёшли португалиялик футболчининг ўйинларини диққат билан кузатиб бормоқда.
Варела жорий мавсумни юқори самарадорлик билан бошлади. У барча расмий мусобақалар доирасида ўтказган 7 та учрашувида 8 та гол уришга муваффақ бўлди.
Маълумотларга кўра, "Арсенал" раҳбарияти ёш ҳужумчини Виктор Дьёкерешнинг эҳтимолий ўринбосари сифатида кўрмоқда. Лондонликлар Вареланинг трансфери бўйича музокараларни қишки трансферлар ойнасидаёқ бошлаши мумкин.
Эътиборлиси, "Монца" португалиялик футболчини жорий йил ёзида "Бенфика"дан атиги 2,5 миллион еврога сотиб олган эди.
Айни пайтда Transfermarkt портали Вареланинг бозор қийматини 5 миллион еврога баҳоламоқда. Бироқ ҳужумчининг жорий мавсумдаги натижалари туфайли унинг трансфер баҳоси яқин вақт ичида сезиларли даражада ошиши мумкин.
