"Манчестер Юнайтед"нинг собиқ ҳужумчиси Уэйн Руни жамоанинг икки етакчиси — Бруну Фернандеш ва Лисандро Мартинесни омма олдида билдирган танқидий фикрлари учун қаттиқ қоралади.

Португалиялик ярим ҳимоячи Чемпионлар лигасида "Комо"га қарши учрашувдаги 1:4 ҳисобидаги мағлубиятдан сўнг бош мураббий Майкл Кэррикнинг тактик қарорларидан норозилигини очиқ билдирган эди.

Бундан аввал "Атлетико"га қарши баҳсдаги 0:2 ҳисобидаги мағлубият ортидан Лисандро Мартинес ҳам клуб раҳбариятини танқид қилган, кейинчалик эса ўз сўзлари учун узр сўраганди.

Руни ҳар икки футболчининг бундай муносабатини худбинлик деб баҳолади.

"Бу футболчилар — худбинлар. Улар фақат ўзларини ўйлашади. Жамоадошлари, мураббий, клуб ходимлари ва мухлислар уларни умуман қизиқтирмайди.

Бруну, эҳтимол, "Манчестер Юнайтед"даги фаолияти давомида энг ёмон даврини ўтказмоқда. Айнан ҳозир у айбни бошқаларга ағдараётгани бежиз эмас. У масъулиятни ўз зиммасига олишни истамаяпти.

Улар худди ўйинчоқларини аравачасидан улоқтириб, ўзидан бошқа ҳаммани айблайдиган гўдакларга ўхшайди", — дея Рунининг сўзларини келтиради CentreGoals.

Эслатиб ўтамиз, "Манчестер Юнайтед" навбатдаги учрашувини 25 октябрь, якшанба куни Англия Премьер-лигаси доирасида "Борнмут"га қарши ўтказади.