«ПСЖ» клубининг собиқ дарвозабони Серхио Рико ва унинг оиласи Испанияда босқинчилик ҳодисасига дуч келди. Номаълум шахслар футболчининг Севилья яқинидаги уйига бостириб кириб, қимматбаҳо буюмларни олиб кетишган.

Ҳодиса шу ҳафта Больульос-де-ла-Митасьон муниципалитетига қарашли Ла-Хулиана турар жой ҳудудида содир бўлган.

Маълумотларга кўра, воқеа вақтида Рико рафиқаси Альба Сильва, икки ёшли ва тўрт ойлик фарзандлари ҳамда қайнонаси билан кечки овқатланаётган бўлган. Шу пайт уйга бошига капюшон кийган беш нафар номаълум шахс кириб келган. Улар хавфсизлик сигнализацияси вақтинча ўчирилганидан фойдаланишган.

Хайриятки, дарвозабон ва унинг оила аъзолари хоналардан бирига яшириниб, эшикни ичкаридан қулфлашга улгуришган. Шу тариқа, улар босқинчилар билан тўқнаш келмасдан, жиддий хавфдан қутулиб қолишган.

Derbyderbyderby.it нашрининг хабар беришича, жиноятчилар уйнинг қолган қисмларидаги барча қимматбаҳо буюмларни олиб чиқиб кетишган.

Айни пайтда ҳуқуқни муҳофаза қилувчи органлар воқеа юзасидан тергов ҳаракатларини олиб бормоқда. Полиция босқинчиларнинг шахсини аниқлаш ва уларни қўлга олиш мақсадида мавжуд далилларни ўрганмоқда. Ҳозирча жиноятчилар қўлга олинмаган.