«Рома»нинг аргентиналик ҳужумкор футболчиси Пауло Дибала жароҳатидан тикланишда ижобий натижаларга эришмоқда. Италия клуби 32 ёшли футболчининг яқин кунларда сафга қайтишига умид қилмоқда.

Sky Sport Italia нашрининг хабар беришича, Дибаланинг болдир мушагидаги жароҳатидан тикланиш жараёни режа асосида кечмоқда.

Аргентиналик футболчи «Реал»га қарши мағлубият билан якунланган учрашувда шикастланган эди. Шу сабабли у «Женоа» ва Братиславанинг «Слован» клубларига қарши сўнгги иккита баҳсни ўтказиб юборди.

Маълумотларга кўра, Дибала 24 октябрь куни «Наполи»га қарши ўтказиладиган учрашувда ҳам иштирок этмайди.

Бироқ «Рома» мураббийлар штаби аргентиналик футболчининг 27 октябрь, сешанба куни «Кальяри»га қарши бўлиб ўтадиган баҳсда майдонга қайтишига умид қилмоқда.

Қайд этиш жоиз, Дибала жорий мавсумда самарали ўйин намойиш этиб келмоқда. У ҳозирга қадар 8 та учрашувда иштирок этиб, 4 та голли узатмани амалга оширган.

Шунингдек, 32 ёшли футболчи зарба бериш имкониятини яратувчи узатмалар кўрсаткичи бўйича энг юқори — 100-процентил даражасида қайд этилган.