Мадриднинг «Реал» клуби афсонаси Рауль Гонсалес Аргентина терма жамоасида Лионель Мессининг муносиб вориси бўлиши мумкин бўлган футболчи ҳақида ўз фикрларини билдирди.

Испаниялик собиқ ҳужумчининг фикрича, айни пайтда Италиянинг «Комо» клубида тўп сураётган Николас Пас келажакда Аргентина терма жамоасининг 10-рақамли футболкасини кийишга муносиб номзод ҳисобланади.

«Менимча, у бундай масъулиятни ўз зиммасига олишга қодир.

Агар танлаш имконияти менда бўлганида, албатта, унга овоз берган бўлардим. Чунки уни жуда яхши танийман. Николасни 14 йилдан буён биламан, у менинг қўл остимда «Кастилья»да ўйнаган.

Ҳамма унинг яхши футболчи эканини биларди, аммо бунчалик юқори савияга чиқишини тасаввур қилмаганди.

У билан бирга ишлаган ҳар бир кунимда Николаснинг энг иқтидорли футболчилардан бири эканини ҳис қилардим. Уни келажакда катта футболга олиб чиқиш мумкин бўлган, юлдузга айланиш салоҳиятига эга ўйинчилардан бири деб ҳисоблардим», — деди Рауль.

22 ёшли Николас Пас сўнгги вақтлардаги ёрқин ўйинлари билан футбол жамоатчилиги эътиборини тортмоқда. Хусусан, у Чемпионлар лигасида «Манчестер Юнайтед»га қарши ўтказилган ва «Комо»нинг 4:1 ҳисобидаги ғалабаси билан якунланган учрашувда битта гол ҳамда голли узатма қайд этган.

Аргентиналик ярим ҳимоячи Лионель Месси терма жамоадаги фаолиятини якунлаганидан кейин 10-рақамли футболкани қабул қилиб олиши мумкин бўлган асосий номзодлардан бири сифатида кўрилмоқда.

Пас Аргентина терма жамоасининг сўнгги халқаро ўйинларида ҳам ўзини кўрсатишга улгурди. У учта учрашувда 3 та гол уриб, битта голли узатмани амалга оширган.

Жорий мавсумда эса Николас «Комо» таркибида 10 та ўйинда майдонга тушиб, 4 та гол ва 5 та ассист қайд этди.

Қайд этиш жоиз, «Реал» ўз академияси тарбияланувчиси бўлган Николас Пасни 80 миллион евро эвазига қайта сотиб олиш ҳуқуқини сақлаб қолган.